英國聖誕節傳統

英國聖誕節傳統大揭秘！有趣文化背後嘅故事

聖誕節喺英國好有氣氛，每一個傳統背後都有啲歷史同文化意義。由裝飾聖誕樹 (Christmas Tree) 到睇聖誕特輯 (Christmas TV Specials)，全部都係英國人過節嘅必備元素。今次就同大家逐個介紹，仲會講吓佢哋點樣變成今日咁受歡迎嘅習俗！

聖誕樹 (Christmas Tree)

聖誕樹喺英國嘅流行係由 Prince Albert 同 Queen Victoria 開始 。Prince Albert 從德國將呢個傳統帶到英國，之後慢慢成為每個家庭嘅聖誕必備。依家，聖誕樹已經成為咗英國聖誕嘅標誌。

聖誕裝飾 (Christmas Decorations)

英國人好重視聖誕裝飾，通常會早喺十二月初開始佈置。但記住喇，一定要喺 Twelfth Night (主顯節前夕) （即1月5 號）之前拆除，因為留太耐據說會帶嚟壞運！咁樣都係為咗新一年有個好運。

聖誕卡 (Christmas Cards)

英國寄聖誕卡嘅傳統好有歷史，最早可以追溯到 1843 年，由 Sir Henry Cole 搞出嚟嘅。當時佢請咗畫家 John Calcott Horsley 設計咗第一張商業聖誕卡，之後呢個習俗就一直延續到依家。

朱古力倒數日曆 (Chocolate Advent Calendars)

倒數日曆其實源於德國，但係到 1970 年代 Cadbury 推出朱古力版後，就好快喺英國流行開。小朋友甚至大人都會每日開一格，等緊聖誕到嚟！

聖誕廣告 (Christmas Adverts)

每年聖誕節前，英國嘅廣告都係焦點，特別係 John Lewis 嘅廣告，通常有啲好溫暖嘅故事，令大家即刻有節日氣氛。另外，Coca-Cola 嘅紅色卡車 (Red Truck) 亦係經典之一。

聖誕拉炮 (Christmas Crackers)

大家有冇見過聖誕餐桌上必備嘅拉炮？呢樣野係由倫敦糖果商 Tom Smith 發明嘅，最初係糖果入面加咗小紙條，後來加埋“砰”嘅聲音，變成咗今日咁受歡迎嘅聖誕玩意。

聖誕布丁 (Christmas Pudding)

英國人食聖誕布丁好有儀式感，傳統會喺入面藏一枚銀幣（ Silver Sixpence ），搵到嗰個人就會有好運。上枱前仲會淋上白蘭地點火，好有氣氛！

聖誕襪 (Christmas Stockings)

聖誕襪嘅故事源於 Saint Nicholas。相傳佢將金幣放入窮人嘅煙囪，金幣啱啱掉咗喺掛住嘅襪入面，呢個故事就慢慢演變成今日嘅聖誕襪習俗。

聖誕特輯 (Christmas TV Specials)

每年聖誕節，英國電視台都會播特別版嘅節目，例如 Call The Midwif 、Strictly Come Dancing 聖誕特輯，成為一家人圍埋睇電視嘅好時光。

聖誕香料酒 (Mulled Wine)

呢款溫暖嘅飲品其實喺 Roman Times 已經有，但直到 19 世紀先同聖誕節緊密聯繫。用香料加熱過嘅紅酒，係聖誕聚會嘅必備飲品。

拆禮物日 (Boxing Day)

Boxing Day，即聖誕節後嘅 12 月 26 日，原本係用嚟將禮物“包裝”（Boxing）好送俾僕人或者窮人，依家已經變成咗大減價日，大部分人都會趁呢日買平貨。